Sokneprest i Nordhordland prosti med sokna i Gulen som tenestestad Den norske kyrkja, Bjørgvin bispedøme

Vil du bli sokneprest i Gulen?
Vi søkjer deg som er glad i folkekyrkja, har interesse for utvikling av gudstenesta og gjerne samarbeider med frivillige, særleg om barne- og ungdomsarbeid.

Kystkommunen Gulen ligg sentralt i nye Vestland fylke, nært store industriområde som Mongstad og Sløvåg/Skipavika. Frå Eivindvik tek det 2 ½ time med bil til Bergen sentrum og 1 ½ time med hurtigbåt, som har daglege avgangar tre km frå Eivindvik sentrum.

Kommunen er stor i utstrekning(596 km²), og er eit eldorado for dei som likar friluftsliv, jakt, padling og gode turstiar. Det er heller ikkje langt til Stordalen og Stølsheimen, med gode skitilhøve. Kommunen er delt inn i fire skulekrinsar; Brekke, Eivindvik, Dalsøyra og Byrknesøy. Dei største øyene har brusamband til fastlandet. Det er ca. 2300 fastbuande som fordeler seg ganske jamt på skulekrinsane.

Gulen har ei rik soge. Gulatinget var det første landsdelstinget i Noreg og ein viktig grunnstein i oppbygginga av statsapparatet etter samlinga av Noreg til eit rike. Gulatingslova har jubilèum i 2024. Ein keltisk og ein anglikansk steinkross i Eivindvik er av dei finaste tidlege kristne minnesmerka i landet, og syner at Gulen låg sentralt til i vikingtida. For meir om kommunen, sjå www.gulen.kommune.no.

Folket i Gulen har ei grunnleggjande positiv haldning til kyrkja. Om lag 80% av innbyggjarane er medlemer eller tilhøyrande kyrkja. Oppslutninga om dei kyrkjelege handlingane er høg. Pr. år er det i snitt 20 dåp, 30 konfirmantar, fem vigsler og 30 gravferder.

Gulen kyrkjelege fellesråd har tilsett kyrkjeverje (80 % stilling), organist/ trusopplæringsmedarbeidar (60 % + 26 %) og kontorfullmektig (40 %). Det er kyrkjetenarar i alle kyrkjene. Kyrkjekontoret er på kommunehuset i Eivindvik. For meir om det kyrkjelege arbeidet, sjå www.gulen.kyrkja.no.  

Det er gledeleg at om lag 9 av 10 ungdomar vel å ha konfirmasjonstida si i kyrkja.
Gulen har fått tildelt trusopplæringsmidlar. Ansvaret for trusopplæringa er knytt til organiststillinga. Konfirmantarbeidet er leia av soknepresten, men det vert stilt ressursar til rådvelde for at ein del av undervisinga kan utførast av andre tilsette.

Det er tre sokn i Gulen kommune. Kvart sokn er representert i eitt felles organ; Gulen kyrkjelege råd. Kvart sokn har si eiga kyrkje. I tillegg er det bedehus med aktivitet på i Brekke og Mjømna sokn. Dei tre kyrkjene er vanlege langkyrkjer frå kring 1860. Og i Mjømna sokn nyttar ein bedehuskapellet på Byrknesøy, som er vigsla til kyrkjelege handlingar, til ein del samlingar.

Prestetenesta vert leia av prosten. Sokneprestane i Masfjorden, Solund og Gulen har etablert eit godt samarbeid, og utvekslar tenester og ansvar etter nærmare avtale. Bispedømerådet har avtale med dei 3 kommunane om finansiell støtte til prestetenesta.

Dersom det er ynskjeleg, kan kommunen bidra til å formidle bustad som kan leigast.

Målforma er nynorsk. Søkjar må førarkort og disponere bil.

Det vil bli utarbeida ei offentleg søkjarliste etter offentleglova § 25, jf. kyrkjeordning for Den norske kyrkja § 42. Dersom du ønskjer unnatak for denne, må du grunngje det i søknaden. Søkjarlista kan bli offentleg sjølv om du ber om unnatak. Grunnlag for handsaming etter personvernforordninga er artikkel 6 nr. 1 bokstav b og artikkel 9 nr. 2 bokstav b og g.

Den som blir tilsett må vise tilfredsstillande politiattest (barneomsorgsattest) jf. politiregisterloven § 39 jf. trossamfunnsloven § 20.
Vi ber om at søknad med CV, vitnemål og referansar vert sendt elektronisk via Webcruiter.