Saemien gærhkoebiejjiej bïjre
Histovrijen bïjre
Voestes aejkien saemien gærhkoebiejjieh öörnesovvi lij 2004, dejnie ulmine ektie saemien gyrhkeles öörnemem buektiehtidh. Lij vihkele saemieh jïjtjh dïedtem utnin soejkesjimmien åvteste jïh ovmessie saemien gærhkoe- jïh kristelesvoeteaerpievuekieh lokngesovvin goh bielie Sveerjen gærhkoste, Nöörjen gærhkoste jïh Soemen Evangeliske- Lutheren gærhkoste. Laavenjostoe Saemien gærhkoebiejjiej bïjre byjjes tseegkesovvi Enarekonvensjovnesne jaepien 2009. Tïjje doekoe Soemen ortodokse gærhkoe aaj vielie meatan sjïdteme.
Saemien gærhkoebiejjieh 2025
Aalkove
Saemien gærhkoebiejjieh 2025 byjjes aalka rïhpestimmiegyrhkesjimmine bearjadahken ruffien 27.b. Dan åvtelen gåarede maalestahkem aktede daejstie beapmoebåvvijste maarhkedesne åadtjodh, jallh maam akt jïjtje dållepaannesne jurjiehtidh gærhkoen lïhke. Aaj gellie prïhtjhgåetieh lïhkebisnie.
Jeenjesh guhkies feelemegeajnoem utnieh jïh joe biejjien åvtelen båetieh, duarstan, ruffien 26.b. Saemien gærhkoeraerie lea gåassoehtæjja akten ektie tjåanghkoen åvteste dej saemien raeriej gaskem gaajhkijste golme laantijste.
Noereprogramme aalka duarstan iehkedsbiejjien, jïh iehkedsandakte sjædta mij leah ræhpas gaajhkesidie. Dovne duarstan iehkedsbiejjien jïh bearjadahken aereden tïjje gååvnese tjåanghkoeh hööltedh jis vaajteles.
Bijjieguvvie biejjiej bijjeli
Bearjadahken 27.6 lea rïhpestimmiegyrhkesjimmie tsåahka 13.00. Aeredsbieijjien gyrhkesjimmien åvtelen lea rihpestimmie göökte gieltegs vuesiehtimmijste mah sijhtieh ræhpas årrodh dovne dejtie mah meatan gærhkoebiejjine jïh voenges årroejidie. Don biejjien nuepie sjædta meatan årrodh gieltegs seminarine, vuesiehtimmien gaavhtan «Holyness of lands», filme «Mer enn bare fjell», seminare repatrieeremen bïjre jïh nuepie soptsestallemem goltelidh vuelien/joejken jïh saalmelaavlomen bïjre. Iehkeden saalmeiehkede sjædta konsertine, åvtelen dah mah sijhtieh meatan årrodh gaskejïjjegyrhkesjimmesne ålkone nuepiem åadtjoeh dam darjodh.
Laavadahke ortodokse aeredsmæssojne aalka åvtelen dïhte gieltegs åejvieseminaare aalka, gusnie Mari Valjakka (Soe), Lovisa Mienna Sjöberg (Nöö) jïh Kaisa Huuva (Sve) fïereguhten faagesuerkeste don barkoen bïjre soptsestieh maam gærhkoe edtja saetniesvoetine jïh likteminie darjodh åvtese. Jienebh gieltegs seminarh aaj don biejjien: vuesiehtimmien gaavhtan akte seminare duedtien bïjre gærhkoetjïehtjelinie, saemien musihkevuekieh goh gyrhkeles barkoe likteminie, jïh ij goh unnemes vihkeles soptsestalleme guktie voenges seabradahkh jïh gærhkoeh ektesne laavsemen jïh tjïertevidtjien vööste berkieh. Aareh iehkeden ektie soptsestimmieståantem soejkesjibie joekoen dejtie unnemes maanide. Iehkede konsertine galhkoe.
Aejlegen aelkebe appellem åadtjodh gærhkoen åvtehkidie dejstie mah meatan noereleejresne. Dan mænngan annje astoe vielie soptsestalledh jallh vuesiehtimmide vuartasjidh, åvtelen abpe öörneme galhkuvegyrhkesjimmine orreje jïh dïedte Saemien gærhkoebiejjiej åvteste 2028 Sveerjen gærhkose vadtasåvva.
Enarekonvensjovnen bïjre
Saemien gærhkoebiejjieh stuvresuvvieh Enarekonvensjovneste. Konvensjovne tseegkesovvi 2009, mubpien aejkien Saemien gærhkoebiejjieh öörnesovvin. Konvensjovne gaskem jeatjah stuvrie mij Saemien gærhkoebiejjiej ulmie lea, jïh guktie dïedtejoekedimmie jïh bijjemes organiseereme edtjieh årrodh. Konvensjovne minngemes aejkien staeriesovvi 2019. Latjkoe lea noerhtesaemien, sveerjen jïh soemen gïelesne.