Teologeles buerkiestimmie teemeste 

Jielije gierkie – Jielije gærhkoe 

Saemien gærhkoebiejjiej teema lea tjagkere gierkielaanten bïjre jïh mijjieh gïeh Kristusasse govlesuvvieh – dïhte jielije gierkie – aaj libie jielije gierkieh, jielije gærhkoe. 

“Båetede dïsse, dïhte jielije gierkie, maam almetjh hiejhtiejin, men lea vaeljehke jïh vyörtegs Jupmielasse, jïh sjïdtede jïjtjh jielije gierkine mah voejkenen gåetine tseegkesuvvieh!» (1.Pet 2. 4-5)  

Kristuse lea dïhte jielije bigkemegierkie maam Jupmele lea veeljeme. Mijjieh haastasovvebe Kristusasse båetedh. Dellie aaj mijjieh jielije gierkine sjïdtebe mejstie maahta gåetiem bigkedh. Daate voejkenen gåetie lea gærhkoe, ektievoete mij Kristusem våaroeminie åtna. Jaahkosne Dïsse, dïhte jielije gierkie, mijjieh libie jielije gærhkoe. 

Guktie lea mijjese jielije gierkine årrodh, jielije gærhkoe? Mij akt dynamiske jieledh. Dïhte gie jeala maahta maam akt sjugniedidh, jïjtjemse sjiehtedidh, daaletje tïjjem, tïjjem åvtese jïh byjreskidie hammoedidh. Saemien aerpievuekien mietie lea vihkele jïjtjemse eatnamasse sjiehtedidh.  Mubpiejgujmie ektine maahta heartoeh jïh faamoem vedtedh gosse bielie jielije gærhkoste. Doh jielije gierkieh vuastalimmiefaamoem utnieh jïh maehtieh jieledenuepide jeatjahtehtedh dennie seabradahkeligke gierkielaantesne. Bovtsen burhvie ajve eatnamisnie gællan jïh lea riejries behtsiedidh. 

 
“Fïereguhte gie mov baakoeh gåvla jïh dorje maam jiehtieh, vååjnoe goh viesjies ålma gie gåetiem baektien nille bigki. Værsjoe jïh dulvie sjïdti jïh bïegke gåetien vööste tsaepmieji. Men idtji slaamh, dan åvteste lij gierkielaantesne.” Matt 7, 24-25 

 
Gosse gierkielaanten nille bigkebe maehtebe jearsoe årrodh gåetie veareldem jïh bïegkem tööllie. Altese baakoeh jïh dååjvehtassh leah tjåadtjan gaajhken tjirrh mij sjugniehtåvva, jïh Dïhte lea mijjine ektine gaajhken tjirrh maam dååjrebe.