Sáme girkkobiejvijs 

Giehtto 

Vuostasj bále hásadijma Sáme girkkobiejvijt jagen 2004, ja dáj ulmmen lij dahkat aktisasj sáme girkkodáhpádusáv. Ájnas oassen lij sáme ietja guovlodin dáhpádusáv ja vil aj vuosedijma sámij moatte lágásj dábijt girkko ja ristagis åsko hárráj Svieriga girkko, Vuona girkko ja Suoma evanjelak-lutherak girkko oassen. Sáme girkkobiejvij aktisasjbargov formálastijma jage 2009:e Anára såbadusájn, ja maŋenagi de le adjáj Suoma ortodåvsa girkko säbrram guovlodittjat ja hásadittjat dáhpádusáv.    

Sáme girkkobiejve 2025  

Álggo 

Jage 2025:á Sáme girkkobiejve almulasj láhkáj álggi rahpamjubmeldievnastusán bierjjedagá bietse 27. biejve. Dán åvddåla de máhtá svarkav oasstet biebbmobuvdajs jali iesj biebmojt dahkat sjtádtjodålån dannák girkko guoran. Lahkabirrusin li aj moadda káffahuodnaha. 

Moattes båhti mälggadis juo biejvvet åvddåla, duorastagá bietse 26. biejve. Sáme girkkoráde guossot gålmå rijka sáme rádijt aktisattjat tjåhkanittjat. Nuoraj guovludahka álggá duorastagá maŋŋebiejve, ja dán biejve le aj gájkajda rabás iehketråhkålvis. Goappátjagá duorastagá maŋŋebiejve ja bierjjedagá ideda le assto tjåhkanahtátjit.  

Biejvijs 

Bierjjedagá bietse 27. biejve le álggojubmeldievnastus kl. 13.00. Idedis jubmeldievnastusá åvddåla rahpi guokta miellagiddis vuosádusá goappátjagá oassálasstijda ja bájke álmmugij. Dán biejve máhtá aj gulldalit miellagiddis seminárajt, buojkulvissan “Holyness of lands”, guovllat filmav “Mer enn bare fjell”, ja säbrrat seminárraj ådåsis hávddádimes ja gulldalit ságastallamav vuoles ja sálmmalávllomis. Iehkedis le sálmmaiehket aktan konsertajn, ja gasskaiján mässo ålggon, gejda sihti.  

Lávvodahka vuolggá ortodåvsa idetmässos ja joarkká miellagiddis oajvveseminárraj, gånnå Mari Valjakka (Fi), Lovisa Mienna Sjöberg (No) ja Kaisa Huuva (Sv) runásti geŋga fáhkaduogátjijn, majt girkko galggá dahkat åvddålij guovlluj duohtavuoda ja såbadime hárráj. Dán biejve li aj ienep miellagiddis seminára, buojkulvissan duojes girkko anon, sáme musijkas girkko barggon såbadahtátjit, ja hájn de vil ájnas runástibme, gåktu girkko vähkkálakkoj bájkálasj sebrudagájn barggaba vasjev ja rasismav duostotjit.    Árraiehkeda suludallap aktisasj subtsasbåttåv sierra láhkáj unnemusájda hiebatjit, ja iehket nåhkå konsärttaj.  

Ájllega de vuostak nuorajlejra oassálasste bukti alodimev girkko åjvijda. Dán maŋŋela de astijdip hájn ságastalátjit jali vuosádusájt gehtjadittjat, desik de ålles dáhpádus nåhkå häjttojubmeldievnastussaj, gånnå aj joarkedip 2028:e Sáme girkkobiejvij vásstádusáv Svieriga girkkuj.  

Anára såbadusás 

Sáme girkkobiejvij hásadimev mierredip Anára såbadusájn, mavva vuododijma jagen 2009, gå nuppát bále hásadijma Sáme girkkobiejvijt. Såbadusán mierredip duola dagu, mij le Sámij girkkobiejvij ulmme, gåktu vásstádusáv juohkep ja manen almulasj hásadimev buktep. Såbadusáv divojma maŋemusát jagen 2019, ja dahta lågådahttá nuorttasábmáj, Svieriga dárruj ja suobmaj.