Asbjørg er til dagleg tilsett i heil stilling som diakon i Ålesund kyrkjelege fellesråd og har arbeidsområdet sitt lagt til Skodje og Ørskog sokn. No har ho permisjon i 20% av stillinga si for å gå inn som vikar i deler av rådgivarstillinga ved bispedømekontoret. Asbjørg er også med i det nye fagutvalet som er oppretta for diakonane og ho har lang røynsle som diakon i Møre bispedøme og har gjort teneste i fleire kyrkjelydar på Sunnmøre. Ho er busett i Ålesund, i gamle Skodje kommune.
Som rådgivar diakoni vil Asbjørg på vegne av Møre bispedøme og Møre biskop, vere kontaktperson for diakongruppa. Ho vil føre vidare dialogen og samhandlinga med diakonane og vil vere bispedømet sitt bindeledd i møte med kyrkjelydane. Ho vil, saman med fagutvalet for diakonane, ha ansvar for tilrettelegging og gjennomføring av fag- og tilsynssamlingar. Asbjørg vil i liten grad ha eiga kontortid i Molde, ho vil arbeide via telefon, på digitale plattformer og via sosiale medier, og er tilgjengeleg innanfor ramma av 20% stillingsressurs. Asbjørg vil vere knytt til kyrkjefagavdelinga ved bispedømekontoret.
Møre bispedøme er glade for at Asbjørg har høve til å gå inn i engasjementet og trur at ordninga vil fungere godt i tida den faste rådgivaren er i omsorgspermisjon.
