Møre bispedømme legg aktivt til rette for kyrkjelege aktivitetar i ramma av ei aukande pilegrimsverksemd.
Gjennom Møre går det to pilegrimsleder som er godkjente St. Olavsveger til Trondheim; Kystpilegrimsleia og Valldalsleden.
Kystpilegrimsleia
Kystpilegrimsleia er ei spektakulær og vakker reise langs kysten med fjordar, øyer, holmar og skjær, som tek opp att og brukar mellomalderen si seglingslei frå Rogaland til Trondheim. Leia blei offisielt opna av preses for Den norske kyrkja på Smøla i 2018. Langs heile kystleia finn vi kyrkjer og heilagstader, spor etter den tidlege kristninga av landet, kongsgardar og tingstadar, gamle handelsstadar og fyrstasjonar, i tett sameksistens med dagens kystsamfunn.
Pilegrimsleden | Kystpilegrimsleia
Valldalsleden
Valldalsleden er ei led frå fjord til fjell, frå kyst til innland. Ei led i fotspora til Olav den Heilage. Då han rømte landet vinteren 1028-1029 drog han sine skip på land i Valldal og derfrå gjekk han over fjellet til Lesja og Dovre. Det er denne ruta Valldalsleden følgjer. Leden blei offisielt opna hausten 2015. Valldalsleden startar på bryggja i jordbærbygda Valldal og går over til Dovre, der den møter Gudbrandsdalsleden.
Pilegrimsleden | Valldalsleden