Halvor Nordhaug gjekk av som biskop i Bjørgvin bispedøme frå 1. desember 2022. Den 6. desember vart seks kandidatar til å overta som biskop presenterte.
Etter den rådgjevande røystinga står følgjande kandidatar igjen:
- Kjersti Gautestad Norheim, sokneprest i Birkeland menighet
- Ragnhild Jepsen, domprost i Nidaros
- Sunniva Gylver, sokneprest i Fagerborg menighet
Gudmund Waaler, Stephanie Dietrich og Nils Terje Lunde var også nominert, men dei fekk ikkje tilstrekkeleg oppslutning i røystinga til å vere med i den vidare prosessen.
Desse deltok i røystinga
Den rådgjevande røystinga er ein del av prosessen med å tilsetje ny biskop. Til saman har 353 røysteføre instansar og tilsette sett opp inntil tre namn i prioritert rekkefølgje. 45 røyster hadde eitt eller to namn. Dette gjev oppslutning på 70 %.
Dei røysteføre er: Sokneråd i Bjørgvin, ungdomsrådet, vigsla kyrkjeleg tilsette i bispedømet. I tillegg har desse røysterett: Prostar i andre bispedøme, ungdomsrepresentantar til Kyrkjemøtet og representantar frå teologiske utdanningsinstitusjonar.
Røysteperioden var frå 5. desember til 5. januar.
Dette er resultatet
Vekting av røystene med utgangspunkt i fordeling av 100 «poeng», gir dette resultatet:
Kjersti Gautestad Norheim 23,84 %
Ragnhild Jepsen 21,83 %
Sunniva Gylver 21,57 %
Gudmund Waaler 15,40 %
Stephanie Dietrich 10,09 %
Nils Terje Lunde 7,28 %
Last ned fullstendig oversikt over røystene her.
Førsterøyster har vekting lik 1, andrerøyster lik 2/3 og tredjerøyster lik 1/3. For å sikre lokal innverknad i prosessen tel røyster frå sokneråd og ungdomsrådet 1/3, prestar og andre i vigsla stillingar i bispedømet 1/3 og nasjonale stemmer tel 1/3.
Vidare prosess
I neste runde skal bispedømerådet i Bjørgvin gje si tilråding, og biskopane vil gje tilråding med grunngjeving til Kyrkjerådet. Dette vil verte offentleggjort 20. januar. Etter dette vil dei tre kandidatane verte intervjua av Kyrkjerådet sitt arbeidsutval.
Det er Kyrkjerådet som tilset ny biskop, ut i frå ei heilskapleg vurdering. Den rådgjevande røystinga, bispedømerådet si tilråding, biskopane sine tilrådingar og individuelle intervju med kandidatane dannar til saman grunnlaget for vedtaket til Kyrkjerådet.
Kyrkjerådet vedtek tilsetjing av ny biskop i Bjørgvin på sitt møte i Bergen, 9.–10. februar 2023.