Du har hjelpt, i Aleppo og Ukraina
Pengane frå Fasteaksjonen i fjor gjorde at Kirkens Nødhjelp kunne hjelpe med ein gong, då jordskjelvet ramma mange million mennesker i Syria i februar. No førebur vi årets aksjon som går av stabelen tysdag 28.mars.
Natt til 6. februar ramma eit svært kraftig jordskjelv i eit frå før hardt krigsramma område i Syria, mellom anna Aleppo. Alle reie første døgnet kunne Kirkens Nødhjelp hjelpe med vatn, varm mat, teppe og madrasser. Og ikkje minst tok dei særleg hand om barn som trengte det.
På liknande vis er Kirkens Nødhjelp på plass i Ukraina der nauda er stor.
Over 100.000,- frå Sula
Alt dette har vore mogleg takka vere pengar som vart samla inn blant anna på Sula under fjorårets Fasteaksjon. Då fekk vi for første gong inn over 100.000,- kroner her på øya. Vi håper på like godt resultat i år. Aksjonsdagen er tirsdag før palmesøndag, altså 28. mars.
Også næringslivet har gitt
Konfirmantar, frivillige og tilsette i Sula kyrkjelyd – og ikkje minst alle som gir til aksjonen – kjem til å gjere ein livsviktig forskjell for dei som manglar så mykje meir enn vi gjer. Fleire gjevarar frå næringslivet har også allereie bidratt.
Aksjonen har i år fått tittelen «Håp i ein drope vatn».
For eit håp kan faktisk byrje med ein drope vatn!
Fekk brønn – kan bli lege
Vatn kan endre eit liv, ein landsby og eit land. Femtenåringen Deodata Julius i Tanzania er eit godt eksempel på det. Før måtte ho gå tre timar to gongar dagleg for å hente vatn til familien. Ho vart trøytt og sliten, og droppa ofte skulen. Då landsbyen fekk brønn, byrja Deodata på skulen igjen. No drøymer ho om å bli lege.
Tilgang til reint vatn gir positive ringverknader, og har forandra livet i landsbyen Deodata bur i. Vassborne sjukdomar er reduserte, og reint vatn har ført til betre helse. Bøndene har effektivisert jordbruket. Smarte dryppsystem gjer at dei kan tredoble inntektene, og stå betre rusta mot klimaendringar. Det er håp i ein drope vatn!
Fasteaksjonen gjev Kirkens Nødhjelp handlingsrommet ein treng for å endre liv på sikt, men også styrke til å redde liv i akutte kriser og katastrofar.
Vi håper at du vil støtte, enten som bøsseberar, sjåfør eller glad givar. Ditt bidrag kan endre liv!
Håpefull helsing
KN-kontakt June Skodje Skaar og diakon Ingvild Snipsøyr, Sula sokn