Kirkens Nødhjelp sin fasteaksjon nærmar seg. I år er denne 6.-8.april. Då vil konfirmantane våre ilag med mange frivillige vere i sving for å organisere og gå med bøsser for å samle inn pengar til fasteaksjonen. Hovudfokuset for aksjonen er reint vatn til menneske som ikkje har tilgang på dette idag!
Kirkens Nødhjelp driv bistandsarbeid i mange land over heile verda, både i akutte kriser og naturkatastorfer, men også med langsiktig arbeid for å gi folk tilgang på noko så livsviktig som reint vatn. Det er 800 millionar menneske i verda som i dag lever uten tilgang på reint vatn. For oss som bur her i Norge er dette nesten umulig å kunne forestille oss. Vi kan berre skru på krana og har ubegrensa tilgang på reint vatn. Andre stader i verda er forholdet til vatn heilt annleis. Mange må gå mange timar kvar dag for å hente vatn til seg og familien, og det er ofte borna som har denne oppgåva, noko som gjer at det ikkje er mogeleg for dei å gå på skule og få seg ei utdanning og slik trygge framtida si.
Alle konfirmantane i Sula kyrkjelyd har i desse dagar undervisning om kva pengane vi samlar inn skal gå til, og mange utrykker at dette påverkar dei og at dette ynskjer dei å gjere noko med! Gjennom fasteaksjonen kan vi vere med å endre liv til det betre for nokon andre. For 300 kr kan eit menneske få varig tilgang på vatn resten av livet. I fjor vart det innsamlingsrekord på Sula, og det håpar vi på også i år! Pengane som kom inn i aksjonen i fjor her på Sula gav varig tilgang på reint vatn for ca 440 menneske. På landsbasis samla vi inn nok pengar til å sikre 120 000 menneske reint vatn livet ut. Har du ikkje kontantar kan du vippse til 2426.
I år har vi i Sula kyrkjelyd også perla armband med slagordet «HÅP I EIN DROPE VATN». Desse kostar 100 kr og kan kjøpast på gudstenester og andre samlingar i kyrkjene våre eller på kyrkjekontoret! Inntekta vil gå til Fasteaksjonen!
Vi er takknemlige for alle som vil støtte aksjonen, og håper alle tek godt imot bøsseberarane som ringer på døra. Hjelp oss å hjelpe menneske som ikkje er like heldige som det vi er. Det ER håp i ein drope vatn!
Ingvild Snipsøyr
Diakon Sula kyrkjelyd