Teolooglaž čiʹlǧǧtõs teeʹmest  

Jieʹlli ǩeäʹdǧǧ – Jieʹlli ceerkav 

Sääʹm ceerkavpeeiʹvi teeʹmm mušttal raʹvves ǩeäʹdǧǧvuâđast da meeʹst Kristõʹsse, jieʹlli ǩeädgga, kuulli oummuin, še jieʹlli ǩeäʹdǧǧen, jieʹlli ceerkven.  

“Pueʹtted suu årra, jieʹlli ǩieʹđj årra, koon oummu lie heelǥääm a kååʹtt lij Vuâsppååʹd vaʹlljeem da suu čõõʹlmin kaallâš. Da šõddâd še jiijj jieʹlli ǩeäʹdǧǧen jiõglvaž rajlmen!” (1. Pee. 2, 4-5) 

Kristõs lij Vuâsppååʹd vaʹlljeem jieʹlli raajjâmǩeäʹdǧǧ. Miʹjjid son auʹǯǯai pueʹtted Kristõõzz årra, ko teʹl meeʹst še šâʹdde jieʹlli ǩieʹđj, koin põõrt raajtet. Tät jiõglvaž põrtt lij ceerkav, õutstõs, koon Kristõs raʹvvai vuâđđan. Ko åskkap Suʹnne, jieʹlli ǩeädgga, leäʹp jieʹlli ceerkav. 

Mâid miârkkšââvv leeʹd jieʹlli ǩeäʹdǧǧ, jieʹlli ceerkav? Jeällmõš lij jååttmõš. Jieʹlli ooumaž pâstt tuejjeed, šiõttlõõvvâd, häämeed ânnʼjõž- da pueʹttiääiʹj di vaaikted pirrõssʼses. Sääʹm äʹrbbvuõđâst lij luõttu šiõttlõõvvmõš kõskksaž äʹšš. Õhttsažkååʹddest däs ooumaž ko vuässââtt jieʹlli ceerkva,  son vuäǯǯ smeʹllkõsvuõđ da viõǥǥ, da jieʹlli ǩieʹđj lie vueʹsttviõkk, kååʹtt pâstt muʹtted jieʹllem vueiʹttemvuõđid õhttsažkååʹdd ǩeäʹdǧǧvuâđast. Puõccujeeʹel vuõrdač määddast valmmšen šõdškueʹtted.  

”Juõʹǩǩkaž, kååʹtt kooll täid saaʹnään da tuejjad tõi mieʹldd, lij mâʹte jeärmmas ååum, kååʹtt raaji põõrtâs kaʹlli ool. Âʹbrškueʹđi, tuʹlvvčääʹcc koolǥi da šuârmmpiõgg vââđai põõrt, leâša tõt ij kõččâm tõn diõtt, ko tõt leäi rajjum kaʹllivuâđ ool.” Matt. 7, 24-25 

Ko mij raajjâp kaʹlli ool, tieʹttep aainâs, što põrtt ǩeâllai šõõŋi vuâstta. Suu sääʹn da låppõõzz pâʹšše, håʹt mii šâdd, da Son lij mij mieʹldd, håʹt mâid ǩiõččlâʹsttep.