Møtene har kome ut av eit ønskje om å styrke kontakt og samhandling mellom biskop, bispedømmeråd, prostar og fellesråd. Det er og i tråd med dei føringane som Kyrkjemøtet vedtok i 2023 med tanke på organisasjonsutvikling framover i Den norske kyrkja.
Stiftsdirektør Freddy Knutsen seier at dei med dette ønskjer å koma tettare på og slik styrkje samhandlinga mellom dei to arbeidsgjevarlinene i kyrkja. Leiinga i bispedømmet har dagleg samarbeid med 46 kyrkjelege fellesråd. - God kontakt mellom bispedømmet og kyrkjeverjene er avgjerande for at vi saman best mogleg kan bidra til å nå måla som sokna har for arbeidet sitt, seier stiftsdirektøren.
Styrkar sam-leiing
Det er sju kommunar i Nord-Gudbrandsdal prosti. Sju kyrkjeverjer har ansvar for den daglege drifta av kyrkja og personalansvar for dei tilsette i fellesråda. . Prosten er biskopen sin stadlege leiar og har ansvar for prestetenesta i heile prostiet. Til utviklingssamtale med biskopen møttest alle dei lokale leiarane og leiargruppa ved Hamar bispedømmekontor. Møtet vart halde på Otta, prostesetet i Nord-Gudbrandsdal.
«-Kjempebra at bispedømmet kom åt oss», seier kyrkjeverja i Skjåk, Arnborg Teigum. Foto: Hamar bispedømmeråd.
Arnborg Teigum er kyrkjeverje i Skjåk. Ho meiner møtet bidreg til å styrke relasjonen mellom dagleg leiing i lokalkyrkja og bispedømmet. - Vi kjenner at vi allereie har ein relasjon med biskopen etter at han nyleg var her på besøk, seier ho. Ho tykte møtet ga høve til å lyfte tankar som ikkje så ofte vert lufta i større forsamlingar. Ho opplevde også å bli høyrd og at tankane nådde fram.
Teigum har vore kyrkjeverje i mange år, men fyrst på dette møtet fekk ho ei oppleving av korleis dei ulike rollene fungerer saman på leiarnivå.
Tema som vart tatt opp på møtet var mellom anna situasjonen i prostiet, arbeid med strategi og felles planer, om samleiing og felles løysingar.
"- Det er både nyttig og hyggeleg å møtast slik", seier stiftsdirektør Freddy Knutsen. Han opplever at relasjonane mellom bispedømet og fellesråda vert styrka og at dette møtepunktet skapar rom for å setja viktige tema på dagsorden.