Hareid sokn er ein viktig, lokal samfunnsbyggjar. Med eit kyrkjelydshus som eit fleirbrukshus, er vi med å skaper treffpunkt og møteplassar opne for alle – noko som bidreg til å skape eit meir levande sentrum.
Hareid sokn overtok Hareid bedehus vederlagsfritt frå Hareid KFUK/M og Indremisjonen 31. oktober 2019, med ein føresetnad om eit tilbygg for kyrkjekontor slik at alt blir samla under eit tak. I samspel med Hareid kommune blei dette ein realitet, og det nye kyrkjekontoret sto ferdigbygd 11. november 2022.
For at eit eldre bygg skal stette dagens krav som eit offentleg forsamlingshus, var det nødvendig med ein del oppgradering som mellom anna brannsikring, isolering, ny løysing for oppvarming og modernisert storkjøkken. Oppgraderinga var heilt nødvendig ikkje minst for at huset skulle bli anvendeleg til ulike bruksformål, både for eige bruk og for utleige av huset – som er ei føresetnad for å få inntekter til å drifte huset.
Kyrkjelydshuset med kyrkjekontor ligg nær kyrkja og sentralt i enden av miljøgata, alt i alt ei god plassering til det aktive, omfattande og førebyggande arbeid som soknet gjer i lokalsamfunnet. Ein stor del av arbeidet til soknet har base i kyrkjelydshuset, ofte i kombinasjon med kyrkja. Med kyrkjelydshuset kan vi samle fleire aktivitetar under same tak, og med eit kyrkjelydshus har vi og klart å utvide og invitert til nye tiltak.
Nokre av tiltaka til soknet på kyrkjelydshuset:
- Ulike undervisningtiltak i trusopplæringa 0-18 år gjennom heile året
- Tweens: Fredagkveldstilbod for ungdom ein gong per månad
- Tombola-kafe ute i bakhagen, sporadisk tiltak etter verforholda
- Superlaurdagar: Tilbod for barnefamiliar ein gong per månad, samlingsstund, måltid, historie og song
- Onsdagsmiddag for bygda kvar onsdag (annakvar gong er det barnekorøving etterpå)
- Småbarnsong annakvar onsdag
- Babysong (kyrkjelydshus eller kyrkja)
- Torsdagstreff ala Sjømannskyrkja annakvar veke på formiddagen, vaflar & kaffi, andakt, fellessong
Utleige:
- Speidarane har eige areal
- Hareid Tensing og band har eige areal
- 3B-bibelgruppe
- Korøvingar vaksenkor
- Hafest-konsert 1 gong i månaden
- Minnesamver etter gravferd
- Konsertar og korkafeear
- Selskap og arrangement
- Møteverksemd
Hareid sokn eig og driv Hareid Frivilligsentral som har sitt eige aktivitetsrom på kyrkjelydshuset:
- Aktivitetsrommet til Frivilligsentralen er ope og tilgjengeleg for gratis utlån til frivillige lag og organisasjonar og er flittig brukt. Det er mykje god og variert aktivitet gjennom veka, både dag- og kveldstid. Her kan nemnast Sanitetsforeining, Pensjonistlaget, Lions, HLF, Eldrerådet, Autismeforeningen, Revmatikerlaget, Fibromyalgi forbundet og Søre Sunnmøre tamilske kulturforening, med fleire.
- Karakveld kvar onsdag kveld (møteplass for menn)
- Hobbyklubb kvar tysdag formiddag og torsdag kveld (ope for alle)
- Natteravnene bruker kyrkjelydshuset som samlingspunkt og føre rapportering
Mål/intensjonen med Frivilligsentralen:
Sentralen skal bidra med å skape møteplassar og vere ein samhandlingsarena for frivilligheit i lokalmiljøet. Vi skal samordne den frivillige innsatsen som både privatpersonar og frivillige organisasjonar i Hareid har, og dermed styrke og fremme det frivillige arbeidet. I tillegg er sentralen eit kontaktsenter for alle som ønskjer å delta i frivillig arbeid, uansett alder, kjønn, økonomisk status eller etnisk tilhørigheit. Sentralen arbeider for å være ope og inkluderande.
Sentralen kan leggje tilrette for at dei som på eige initiativ vil drive ein frivillig aktivitet, skal få drive med det. Frivilligheit må vere prega av lyst – og på premissane til dei frivillige. Vi ønskjer å samarbeide med ulike lag/organisasjonar, skule, institusjonar, for å bidra til aktivitet og leggje tilrette for ulike, gode møteplassar. Med dette kan vi forebygge einsemd og sjukdom.
Det er ei sann glede å både sjå å oppleve alt som skjer på kyrkjelydshuset, alle dei ulike aktivitetane og treffpunkta som skapast av folk - og for folk i vårt lokalsamfunn. Kyrkjelydshuset er eit brukshus ope for alle!