- Det er godt å sjå at medlemmane våre opplever ei sterk tilknyting til kyrkja, sjølv i ein tid med ein fleirreligiøs kvardag, seier fungerande biskop Sinder Kulø.
8 av 10 medlemmer, 84 prosent for å vere nøyaktig, ville døypt barnet sitt i kyrkja dersom dei fekk eit barn no.
Det viser ferske tal frå Den norske kyrkja si medlemsundersøking. I Møre bispedøme er dette ei stabil utvikling frå tidlegare år. I 2021 var talet 79 prosent, i 2020 var det 84 prosent og i 2019 var det 82 prosent.
Kyrkja er der ved viktige livshendingar
Medlemsundersøkinga vert gjennomført annakvart år (2020 var eit ekstraår som følgje av pandemien) og ein spør om medlemmene ville vald dåp, konfirmasjon, bryllaup og kyrkjeleg gravferd.
I Møre bispedøme er det jamne tal samanlikna med tidlegare år. 72 prosent ville valt kyrkjeleg konfirmasjon om dei skulle verte konfirmert no, og 62 prosent ville vald kyrkjebryllaup.
Heile 82 prosent svarar at dei vill vald kyrkjeleg gravferd. Det er ingen skilnader mellom menn og kvinner.
85 prosent er glad for at kyrkja er der når folk treng den, og 59 prosent svarar at dei opplever at kyrkja er der ved viktige livshendingar.
– Kyrkja sin plass i Møre bispedøme er framleis sterk. I kvart einaste lokalsamfunn er det ei kyrkje og gode medarbeidarar som tek imot folk i sorg og glede. Særleg viktig er kyrkja når livet opplevast ekstra sterkt, til dømes i samband med krisehandtering, seier Kulø.
Mange innom kyrkja
87 prosent av dei spurde svarar at dei har vitja kyrkja minst ein gong det siste året. Det gjeld alle former for besøk, som gudsteneste, kulturarrangement, korøvingar, besøk på kyrkjegard og andre aktivitetar. Det er den høgste vitjingsfrekvensen i landet, og ein oppgang frå 73 prosent i 2021 og 83 prosent i 2020. Det er og ein liten oppgang frå 86 prosent i 2019, året før pandemien. 53 prosent har vore innom kyrkja minst fem gongar.
75 prosent er oppteken av at kommunen må vedlikehalde kyrkjebygget, og 65 prosent svarar at dei opplever ei ro når dei er i kyrkja.
– For biskopen og leiinga av kyrkja er det godt å sjå kor viktig tilknytinga til kyrkjebygga våre framleis er. Dette ser vi særleg i samband med bispevisitasar og kyrkjejubileum. Det er godt å sjå den breie eigedomskjensla mange har til kyrkja si der dei bur. Dette er ein viktig verdi å ta vare på, også i framtida, meiner Kulø.
Medlemsundersøkinga er gjort på oppdrag frå Kyrkjerådet og utført av Opinion frå midten av september til starten av oktober 2023.