Soknerådet på Kyrkjebø og i Vadheim starta optimistisk med å invitere til vårleg dugnad på kyrkjegardane 14. april. Dårleg ver gjorde at alle plakatar fekk endra dato til 21. april. Men tru det eller ei – heller ikkje denne onsdagen vart det ”godt og tenleg ver”.
Endeleg 28. april skein sola – og sjøl om nordavinden var kald, møtte det 14 på kyrkjegarden på Kyrkjebø og 12 i Vadheim.
Gode arbeidsfolk – karar og kvinnfolk – gjekk laus med hagesakser, spadar, river og hakker. Det vart sopt og raka og luka. Den eine sekken etter den andre vart fyllt med det som skal kunne bli god kompost med tida. Sturla Bell Fossen kom med tilhengar og det vart rydda og ordna.
Dugnad er ikkje dugnad utan at det også vert plass for kvil, kaffi og noko å bite i – og ikkje minst ein prat om eitt og hitt. Dugnad er arbeid, men også ein møtestad og ein stad for å treffe sambygdingar. Kjekt å arbeide saman – og effektiv jobbing av fleire i to timar gjorde stor skilnad.
Soknerådet er glade for frammøtet både i Vadheim og på Kyrkjebø. Og folk i bygdene våre kan vere takksame for innsatsen med å gjere kyrkjegardane velstelte.
Helga Hjetland