Sju japanarar, av dei fem kvinner og to menn, er til stades på gudstenesta 23. september – i tillegg til to norske. Åshild Bjørkum Furukawa frå Meland forkynner Guds ord til forsamlinga.
For ein nordmann som ikkje kan japansk, er det vanskeleg å skjøna stort meir enn namna på dei bibelske personane. Men salmetonane er kjende nesten alle saman. To av dei er melodiane til «Navnet Jesus» og «Hellig, hellig, hellig». Dei er ei påminning om at det er mange kyrkjelydar i Japan som er planta gjennom arbeidet til norske misjonærar.
Furukawa har gjennom eit langt yrkesliv budd og arbeidd som misjonær for Det Norske Misjonsselskap i Japan. Melandbuen er no pensjonist. Men mest i namnet. For tida er ho på eit fleire månader langt opphald i teneste for kyrkja i Japan. Denne søndagen gjestar ho altså Myodani. Også etter japansk målestokk er dette ein liten kyrkjelyd, men dei har eit fint kyrkjebygg, som vart reist i 1978.
Arve Kjell Uthaug, 23.09.18