“Yes! I dag er det God nok” har helsesjukepleiar Charlotte fått høyre i gangane på Landro skule. Ho er med i samarbeidet “God nok” som kyrkja og kommunen har på Landro skule. "God nok” skal styrke barn si mentale helse, gi dei god og positiv tru på seg sjølv og oppmuntre dei til å sjå på fellesskapet som ei styrke. Dette skal gje 7. trinn ei god hjelp i overgangen frå barneskule til ungdomsskulen. Ein overgang som for mange kan vere ei utfordring, men også ei tid full av forventning.
Då regjeringa i 2022 tydeleg uttrykte ei bekymring for barn si mentale helse gav dei ansvar ned på kommunenivå og etterlyste tilbod der barn kunne styrke si mentale helse gjennom samspel, fellesskap og aktivitet.
“God nok” eit livssynsopent tilbod, vart starta på bakgrunn av dette, og eit godt samarbeid mellom skule, helsesjukepleiar og kyrkja vart etablert. “God nok” er ei av hovudoppgåvene til diakon Synnøve Elvina Engelsen Eide i Landro.
Kvar måndag møter 24 12-åringar helsesjukepleiar Charlotte og diakon Synnøve gjennom tema-samtale i grupper, leik, samspel og eit felles måltid. Det er også fire frivillige medarbeidarar som er med oss annakvar måndag når "God nok"-gjengen er ein og ein halv time i kyrkja. Vi vil framheve glede, positivitet, og bruker fellesskapet til å løfte barna opp. Dei er god nok - akkurat slik dei er! Gjennom “God nok” får dei også noko å sjå fram til, og eit fellesskap elevane gler seg til! Elevane seier sjølv at “Vi opplever trygge vaksne og at dette er ein trygg stad. Det er veldig gøy å være med, og vi får vere med vennene våre på “God nok”.
Helsesjukepleiar Charlotte Jørgensen Glitre legg vekt på at gjennom aktivitetar, grupper og samarbeidsleik får elevane kunnskap og verktøy til å møte kvardagen med.
“God nok”-gjengen avslutta haustsemesteret med ei god bowlingrunde på Fjell-ly, med mykje god pizza og julebrus. Det var mykje latter, ein god del meistring og mange heiarop! Vi sjåast i 2025.
