Undervisning for vaksne i kyrkjelyden
Kursa kan nyttast som dei er, verte tilpassa lokale ønskjer, eller vere ein mal for å lage eigne kurs. Det viktigaste er at ein kjem i gang med noko. Det kan føre til vitalisering av gudstenestefellesskapet og rekruttere til frivillig innsats. Men viktigast av alt er at samfunnet treng menneske med bibelkunnskap og evne til å bruke gode bibelske prinsipp og verdiar i sin kvardag. Vi må lære sjølv for å kunne gi vidare til generasjonane etter oss. Kven skal delta i trusopplæringa av barn og unge i kyrkjelyden, og kva skal dei kunne for å hjelpe til? Opplæringsbehovet i trusopplæringsreforma blir til dømes ikkje dekka av berre tilsetteressursar.
Bakgrunn for kurshefta
Bjørn K. Nygaard har lang erfaring i å utvikle bibelstudiemateriell, og har kombinert skriftlig utvikling av ressursar med aktiv vaksenundervisning i ulike kyrkjelydar. I høve ein visitas i Biskopshavn oppmuntra biskop Halvor Nordhaug Bjørn Nygaard til vidare arbeid med ressursmateriell. Ut frå denne samtalen har vi fått tre hefte i serien Tid for tru.
Vi veit det er mange som har eigne idear til kursopplegg eller som har nytta eigenutvikla materiell i undervisning. Ta kontakt med oss om de tenker opplegget dykkar kan vere av interesse for andre.
Den apostoliske trosbekjennelse (2014)
Dette er det første heftet i serien Tid for tro. Hovudtemaet i kurset er ein gjennomgang av Den apostoliske truvedkjenninga. Ressursheftet har i tillegg mykje godt ressursstoff om korleis ein kan arrangere bibelundervisning i kyrkjelyden. Opplegget kan gå over fem kveldar. Først ein introduksjonskveld med fokus på heilskapen, så tre kveldar med kvar sin del av truvedkjenninga, og til sist ein avslutningskveld som tek opp truspraksis; «kva gjer dei kristne når dei trur?».
Heftet har blitt brukt i mange kyrkjelydar i bispedømet, med godt resultat, og har også inspirert til andre tilsvarande kurs. Dagen hadde hovudsak om heftet 24.03.15 med forsideoverskrift: «Starter søndagsskole for voksne». Det var ein opplysande og fin artikkel på to sider der Bjørn Nygaard blei intervjua om temaet trusopplæring for vaksne. Det kom i etterkant ein god del spørsmål frå andre stader i landet om heftet. Og det er grunn for å tru at det har ført til kurs i fleire bispedøme.
Til glede. Bibelarbeid over Filipperbrevet (2018)
Heftet er nummer to i serien Tid for tro. Hovudtemaet i dette kurset er ein gjennomgang av Filipparbrevet. Ressursheftet gir ei innføring i korleis ein kan arrangere undervisningskveldar i tematisk kombinasjon med gudstenester i kyrkjelyden. Opplegget er skissert med ein innleiingskveld, fire kveldar med tema frå kvart sitt kapittel i Filipperbrevet og med tematisk kopling til etterfølgande gudsteneste. Som avslutning er det tenkt ei kveldsgudsteneste med meditasjonsvandring over tekstar frå Filipperbrevet.
Men dere hører Kristus til. Bibelarbeid over Første korinterbrev (2022)
Heftet er nummer tre i serien Tid for tro. Temaet er Første korintarbrev og det er skissert fire samlingar og laga veksellesing til bruk på temasamlingane. Heftet er på 84 sider og har gjennomgang av heile brevet, og mykje bakgrunnstoff. Det går an å dele opp stoffet på anna måte, og slik ha fleire samlingar. Heftet er som dei andre, meint som ressursmateriell der dei som skal halde kurset, kan velje ut det dei vil fokusere på og opplegget elles.
Tid for vaksenopplæring i kyrkja
For tida vert det arbeidd med ny plan for kyrkjeleg undervisning og læring i kyrkja. Her vil det bli fokusert på livslang læring, og at det er viktig med undervisningsopplegg også for vaksne i kyrkja.
Opplegga er godkjente av www.k-stud.no, og kan søkjast studiestøtte for.
Sjå nedst på nettsida for hefta i PDF-format og presentasjon (PowerPoint).