Biskop Ragnhild kjem for å halde jubileumsgudstenesta i Gulen kyrkje i Eivindvik 25. august. Dette er siste post i det offisielle programmet for jubileumshelga.
Innhaldsrikt program
Gulatinget 2024 har eit spanande program frå fredag 23. til søndag 25. august. Det blir konferansar, kunstutstilling, konsertar i fleire sjangrar og famileførestiling med Fargespill.
Eit av høgdepunkta er festframsyninga "Dei guddomelege søstre" laurdag kveld. Dette er ein samproduksjon mellom Gulatinget og Den Nationale Scene, i samarbeid med Kyrkjekultur Vest AS. Her framfører fire skodespelarar tekstar av m.a. Jon Fosse, til musikk og korsong og med visuell lyssetting på Tingveggen.
Jubileumsgudsteneste
Alle er velkomne til gudsteneste i Gulen kyrkje i Eivindvik søndag 25. august kl. 11.00. Den vert leia av biskop Ragnhild, og mange fleire deltek. Det blir song av skuleelevar og av Brekke mannskor. Andre medverkande er prost Helge Taranrød, fungerande sokneprest Bjørn Magne Hansen, organist Peter T. Jobbagy, ordførar May-Lynn Osland og den nye soknepresten Håkon Kinsarvik. Etter gudstenesta blir det kyrkjekaffi i Gulasalen på kommunehuset.
Tingveggen i Gulen er sentral under Gulatinget 2024.