Utdelinga i gang
Fredag 9. juni kom bilen med containeren frå hamna i Santiago de Cuba til kyrkja Iglesia Evangelica Unida en Cuba (IEU) der 15 personar stod klare. Dei lossa containeren på tre timar og bar alt til tilviste rom i kyrkja, for inspeksjon av Tollvesenet og for å starte systematisk fordeling av innhaldet til dei ulike kyrkjelydane som gjer den konkrete fordelinga av mat, klede, leikar, syklar, hygieneartiklar til einskildpersonar og ulike institusjonar. Sendinga blir fordelt til folk i dei austlege provinsane Santiago, Guantánamo og Holguín.
Enormt takksame
– Vi er så takksame til Normisjon og folk i Bjørgvin bispedømme for å hjelpe oss i den vanskelege situasjonen landet vårt går gjennom, seier biskop Virgen Laborde i IEU.
– Tusen, tusen takk, i Kristi namn, til alle brødre og søstre som på ein eller annan måte har bidratt til dette som vi vil fordele vidare gjennom eigne kyrkjer og kyrkjer vi jobbar saman med.
– I ein situasjon der mange familiar og einskildpersonar på Cuba lever i «ekstrem fattigdom» og ikkje har nok pengar til mat, såpe, vaskemiddel eller klede, så er det veldig meiningsfullt å dele med våre søsken på Cuba på denne måten, seier Kjell Ove Hatlem, koordinator for Bjørgvin bispedøme sitt venskapssamarbeid med IEU og Normisjon sin Landkoordinator for Cuba.
– Og gjennom mange år med samarbeid med desse kyrkjene, så veit vi at hjelpa kjem fram til dei som treng det, legg han til.
