Jazz & Koral har, tradisjonen tru på Allehelgensdag, konsert i Ulstein kyrkje, denne gongen saman med Vox Virorum frå Hareid som gjestar.
Konserten med Jazz & Koral markerer slutten på ei helg der mange har kjent på saknet etter dei som er borte. Over heile landet har kyrkjene halde ope denne helga og tatt i mot folk som har hatt behov for det. Slik også i Hareid og Ulstein.
Jazz & Koral hadde sin fyrste konsert i Ulsteinvik i 2007 som eit prosjekt. Denne var svært vellukka og ensemblet må kunne kallast ein suksess etter fleire vellukka kyrkjekonsertar i Ulsteinvik, Spjelkavik, Fosnavåg, Larsnes, Voldsdalen, Sjøholt, Sæbø, Volda og Valderøya.
No er Jazz & Koral klar for ny konsert i Ulstein kyrkje første søndagen i november, og byd i år på ein variert konsert med salmar som utgangspunkt først og fremst.
Ståle Helvig og Rune Ertesvåg let dei to svært ulike instrumenta kyrkjeorgel og gitar møte kvarandre for nye tolkingar av nokre av våre mest kjære salmar.
Ann Cesilie Skundberg er gruppa sin faste vokalist. Ho har lang fartstid som songar og meistrar det sakrale i salmar og sjelfull song i jazz-, soul- og gospelsjangeren.
Bertil Tødenes, Jan Thormodsæter og Bjørnar Hovlid utgjer resten av bandet i Jazz & Koral. Alle dyktige og erfarne musikarar på sine instrument, slagverk, bass og piano- og er også mykje brukte i andre musikalske settingar og prosjekt i området.
Vox Virorum frå Hareid, mannskoret med ei dame, har vore ønske som gjestar på Allehelgenskonsert i Ulsteinvik før, men først i år blir det realitet!
Koret har markert seg sterkt i kormiljøet på Sunnmøre, dei har delteke både i NRK og TV2, dei fekk Premio Speziale for uvanleg fin ensemblesong under ein korfestival i Italia, og dei har formidla vakker korsong i messe i sjølvaste Peterskyrkja i Roma.
I dag har koret 9 mannsstemmer og ei kvinnestemme, og fleire av songarane har dirigenterfaring frå andre kor. Dei syng romantisk kormusikk, nyare norsk og nordisk musikk, kyrkjemusikk, Johan H. Grimstad, Bellmann og Beatles.
På konserten i Ulstein kyrkje vil dei også samspele - og synge nokre salmar med spennande arrangement av Bjørnar Hovlid og Jan Thormodsæter i Jazz&Koral.
Billettpris: kr. 250 + kr. 20 billetteringsgebyr
Billettsal via Sjøborg si billettteringsløysing