Vel møtt til gudsteneste 1.pinsedag kl 11:00 i Manger kyrkje!
Heile Den norske kyrkja tek i bruk ny gudstenesteordning i desse tider. På Radøy, og mange andre stadar i Nordhordland, innfører vi den nye ordninga 1.pinsedag.
Endringane for vår del er ikkje så store. Det er nye samlings- og forbøner, og fornying av språkbruken i liturgien. Den største endringa du vil leggja merka til hjå oss er ein heilt ny melodi på "Kyrie Eleison". Denne er skreve av komponisten Halvdan Nedrejord, og har sine røtter i den samiske musikktradisjonen. Sjå litt lenger ned på sida for video, slik at du kan øve før du kjem i kyrkja!
Vi lagar også nye liturgihefte som vi deler ut til kyrkjelyden saman med salmeboka kvar søndag. Heftet ligg allereie klart på nettet.
Etter gudstenesta vil det vera eit soknemøte om den nye ordninga. Soknerådsleiar Gunnar Kartveit vil orientere om dei vedtaka soknerådet har gjort, og det vil vera høve til å koma med spørsmål og kommentarar. Merknadar frå soknemøte skal leggjast ved gudstenesteordninga vår ("grunnordninga") når den sendast til prosten for godkjenning.