Hellodagat Jerusalemas
Čieža vahkku maŋŋel beassážiid bođii hellodatbeaivi. Dat lei Mosesa ja logi báhkkoma muitobeaivi. Máŋggas manne tempelii. Sii giite Ipmila ja lávlo:
Buot du báhkkomat leat vuoiggalaččat.
Veahkehit mu iežat gieđain,
go mun lean válljen čuovvut du báhkkomiid.
Máhttájeaddjit ja Jesusa ustibat ledje maid čoahkkanan. Fáhkka gullui garra dálki. Dollanjuokčamat ihte, juohkásedje ja luoitádedje iešguđetge ala. Bassi Vuoigŋa devddii sin buohkaid, ja sii sárdnugohte sierra gielaiguin. Gávpogis orro olbmot máŋgga riikkas. Sii jerre: Almma dát geat sárdnot, leat galilealaččat? Muhto mii gullat sin sárdnumin min iežamet gielain.
Dalle Peter loaiddastii ovdan oktan dainna oktanuppelohkásiin. Son sártnui: Dál dáhpáhuvvá nu go profehta lea cealkán:
Ipmil áigu golggahit vuoigŋa buot olbmuide, nuoraide ja boarrásiidda, nieiddaide ja bártniide. Vel bálvaleddjiide ge. Jorgalehket, ja iešguhtege dis diktos iežas gásttašuvvot. Ipmil áigu addi ándagassii din suttuid ja addit didjiide Bassi Vuoiŋŋa skeaŋkan.
Dán beaivvi gástašuvvojedje golbma duhát olbmo. Sii bisso ovttas ja illudedje. Sii giite Ipmila ja lávlo:
Don vuolggahat vuoiŋŋat,ja eallin sivdniduvvo,
don ođasmahtát eatnama hámi.
Vare Hearrá gudni bisttášii agálaš áigái,
vare Hearrá beasašii illudit daguidis dihte!
Teaksta ja govva gullá "Buot buorit" girjái (dáppe ođđa jorgalus). Olles girjji sáhttá oastit Skrifthuset neahttasiidduin.
Liŋka teavsttaide biibbalis: biibbal.no (Apd. 2)
Dieđut rávis olbmuide
Hellodagaid basuhit vihttalogi beaivvi maŋŋel beassážiid. Maŋŋel dáhpáhusaid beassážiid lei Jesus guođđán máhttájeddjiid, muhto lohpidii ahte Ipmil galggai ain leat sin mielde. Hellodagaid mii basuhit ahte Bassi Vuoigŋa bođii máhttájeddjiide, ja lea risttalaš girku álgu. Hellodagat mearkkaša vuoigŋa ja ođđa eallin, muhto maiddái máŋggabealatvuohta. Hellodatbeaivvi ipmirdedje fáhkka olbmot geat hupme iešguđet gielaid maid máhttájeaddjit sárdno. Dát muitala ahte girku sáhka gullá buohkaide, beroškeahttá giella-, etnalaš dahje kultuvrraš erohusain. Hellodagat ásahit girku máilmmiviidosaš universála vuoiŋŋalaš oktavuohtan.
Dárogiel sátni pinse ja eaŋgalasgielsátni Pentecost boahtá greikka sánis pentekoste, mii mearkkaša vihttalogát. Lei álggu rájes juvddálaš basi sjabuót namma, maid basuhedje vihttalogi beaivvi maŋŋel pesach – mii lei juvddálaš beassášbassi. Juvddálaš Sjabuót basuhit earret eará muitin dihte ahte Moses oaččui logi báhkkoma (lága) Sinaiváris.
Maid hellodagaid sáhttá bargat - dolastallat ja lastarissit
Govva: Pixabay
Hellodagaid lea fiinnis olgun dolastit. Dolla muittuha maid min dollanjuokčamiid mat bohte máhttájeddjiid oivviid nala.
FUOM! Jus lea goikkádat, ferte várrogas leat dolastallamiin.
Govva: Priváhta
Sáhttá maid čiŋahit viesu lastarissiiguin. Sáhttá čiŋahit olgun dahje siste.
Hellodagat buohkaide
Beroškeahttá makkár giela hupme, de buohkat ipmirdedje hellodatmuitalusa. Risttalaččat gávdnojit miehtá máilmmi ja hupmet ollu iešguđetlágán gielaid. Dihtet go don ahte Biibbal lea jorgaluvvon sullii 3000 gillii.
Galle giela don humat?
Dovddat go muhtima gii hupmá eará giela go don?
Máhtát go sániid eará gielaide?
Dákko sáhtát čálihit olggos russolassátneskovi Hellodagaid birra (ráhkadan: Skrifthuset)
Ruossalassánit gullá "Buot buorit" girjái. Olles girjji sáhttá oastit Skrifthuset neahttasiidduin.
Ávvudit girku riegádanbeaivvi
Govva: Pixabay
Hellodagaid gohčodit dávjá girku riegádanbeaivin, ja ollu girkuin bovdejit dábálaččat mánáid riegádanbeaivedoaluide. Soaitibehtet dii háliidit ráhkadit smávva riegádanbeaivedoložiid ruovttus, gáhkuin, čiŋaiguin, stohkosiin ja hellodatmuitalusain?
Biegga
Bassi vuoigŋa bođii máhttájeddjiide dálkkiin ja dolaiguin. Unna bieggamilloš sáhttá govvidit biekka fámu.
Don dárbbašat báhpira mas kvadráhtta hápmi, skárriid, linjála, muorrasákki, rievnni ja unna helmmoža. Dáppe oainnát movt ráhkadit bieggamilloža.